由屋邨妹、到人妻、到做母親。宜家阿女識行識走，開始同佢一齊看世界~ 重拾返呢個blog ，由#莎莉看世界 變 #莎莉一家看世界 😊
阿女19個半月，今日我地去左 #嘉道理農場
原諒我玩一個好爛既食字，去到嘉道理農場俾咗入場費，問職員先知而家已經冇豬睇，簡直係「晴天pig靂」。
去嘉道理農場因為我好想睇豬，其一係因為睇豬係當年同老公拍拖嘅其中一個節目，由 #大花白 到 #豬拖沙 ，呢個回憶好溫馨；其二就係阿女而家識講個pig字，又有幾隻豬公仔，想畀佢去睇下真嘅豬。
算喇，都係由個行程順序講起。
本來計劃搭64k，但係驚老公覺得舟車勞頓，所以決定搭uber。落車嘅時候師傅問我哋，「今日呢度有咩特別活動？我未嚟過呢度呀。」
我笑笑同佢講，今日嘅特別活動就係星期日family day。
//
買飛入場，成人50蚊，四歲以下免費。長者同團體都分別有優惠，如果要搭埋觀光車上山就車費另計。
今日天氣幾好，我哋去到都算早。人流唔多，職員見到有小朋友好nice咁同我哋講話去邊度邊度有馬騮睇，我就順便問佢今日啲豬幾點出嚟。
佢話：無喇，啲豬好老，個幾月前已經無左喇。
🥲🥺
計劃趕不上變化，都係收拾心情繼續行程。
我哋唔係好方便行就留喺山下區域活動。
睇咗唔同動物，有上次走失咗嘅aberdeen，有各類猛禽（個造型好似神雕講真），有赤麂，有魚有鸚鵡有了哥等等等等。。呢啲阿女都未識講，係去到睇豹貓嘅時候佢識喵喵叫。
其實園區環境都好舒服，不過附近都有啲工程進行緊唔知係起啲乜嘢。
//
門票話貴又唔係太貴，佢有啲保育成分在內咁都算值得入去睇。
回程嘅時候我同老公講，其實呢度都有得買年票，我哋要唔要買年票入嚟多啲行下。老公話如果有返大花白即刻買 🥲
但係我研究咗一陣，呢度雖然叫農場，但係其實佢展示嘅動物主要都唔係食用。睇簡介其實好多動物都係拯救或者充公得返嚟，然後就喺園區住咗落嚟。睇嚟如果唔係邊度有啲非法走私嘅豬，都好難再有大花白睇喇。
（適逢昨日有單野豬既新聞，唉。生活艱難真係。）
//
總括黎講，呢度都係適合一個小郊遊嘅好地方。樓梯都比較多所以我哋冇推車，但係有啲地方其實都有啲斜又無欄杆。老公覺得如果小朋友再大少少，但又未識自律甩繩馬騮咁嗌佢唔住嘅話，嚟呢度都會有少少危險。但係如果再重啲我又唔想揹佢行，所以幾時再嚟都係要計劃一下先。
臨走前去睇咗佢個育嬰室，都乾淨企理 👍🏻
阿女乖乖合作行咗唔少樓梯，媽媽表示滿意 😊 有時睇動物嘅時候要用啲眼力搵隻動物匿咗喺邊度，我唔知阿女明唔明我哋做緊咩。但係佢見到貓貓識喵喵叫，希望佢今日都有啲得著 😂
再努力計劃下行程睇下下次一家人去邊度玩好先。
（另外，請問香港仲有邊度有活豬睇🐷）
Ig: yaukeeyk
