兩日一夜澳門遊【新濠影滙、巴黎人、JW Urban Kitchen】

五月中，酷熱天氣警告初起那個周末和奀仔到了澳門一遊（上年抽中啲旅遊禮券仲剩$2,000未用，就輕輕鬆鬆用埋佢啦）。

去澳門輕鬆遊，不外乎住下酒店食下buffet。$2,000 (補多少少)足夠book到《新濠影滙 明星滙》雙人房一晚（連蝙蝠俠夜神飛馳4D體驗兩位 + $200 coupon）及金光飛航來回船飛兩套。我們沒有特別編排行程，真的很隨心就出發了。

巴黎人鐵塔

在港澳碼頭出境時，櫃枱(非入境處)邊查船飛邊遞給我們巴黎人的coupon，有得上鐵塔（個七樓）。咁正? 好啦第一站就去巴黎人玩下～

好熱，好曬。不過都幾靚。

JW Urban Kitchen

由於呢個package唔包三餐～於是小妹我自掏腰包加左個LUNCH BUFFET~ JW Urban Kitchen，好食過上次銀河群芳好幾倍!!! 地方大，坐得舒服，食品種類多、服務仲好好。

奀仔一次拎得太多碟，有靚女服務員幫佢拎埋飲品返枱 (係玻璃樽裝果汁)～然後同一位服務員見我地飲品飲晒，問洗唔洗再幫我地拎… ^^　仲有另一位男侍應喺奀仔出去拎野食既時候將佢扔埋一邊的餐巾摺返個三角形出黎 … 太細心了吧。整體感覺是好舒服的 ….

還要一提吃飽飽覓路回銀河正門時，遇到很熱心很好傾的清潔姐姐。聊得很愉快，這就是旅遊的樂趣吧。

8字摩天輪

晚上玩摩天輪，門票每位$100，剛好把$200 coupon換了去坐一下~ 感受嘛 …. 真的很一般。夜景一邊是地盤，另一邊比較靚少少望返去銀河。不過值得一讚就是可以直接在摩天輪入口處用$100券進場，不用又去甚麼服務處換甚麼券之類，這點對客人而言是很方便的。

其實所謂8字摩天輪並不是8字運行的，只是楕圓運行，外觀上弄得像8字而已～

蝙蝠俠夜神體驗

這個，推介度僅次於JW個BUFFET ～都幾好玩，大人細路都啱。網上有些comment說得比較誇張… 甚麼會嘔之類，其實不會啦。娛樂性有7-8分。

留意返不能帶背包進場，要先到一樓的存放處寄存背包。

葡韻

第二天的午餐去了吃葡國菜。去了我和奀仔的老地方 — 葡韻。其實說來好笑，我和奀仔是第一次一起來這裡吃，只不過從前我們都各自來過這裡，而且感覺不錯。沒有異議再來這間餐廳～

仍然是一貫的感覺，老闆很熱情，wifi很流暢，比較家庭式的感覺，坐得舒服也吃得愉快。味道OK份量算多～結帳時還送了一人一小杯酒。

不過留意返，其實呢間野唔算平的，結帳時奀仔也說，幾乎就係同尋日個buffet差唔多。

（順帶一提，原來官也街的公雞已經結業了）

明星滙

最後，講講酒店。房間比想像中細左啲啲，得企缸無浴缸～不過我地住得高，景觀都算開揚（仍然是地盤景）。check in/check out 也很方便，如果是用信用卡付按金，退房時根本不用排隊，直接把房卡投入收集箱就可以了。

最後是花絮照片:

這是巴黎人的發財車 。正當我話「粉紅色好靚丫」，奀仔一句「好似粉紅色底褲」，整個感覺都崩壞了 …. 

分享玩畢。

********

Haha，這篇分享沒甚麼養份呢。不過有時候來個放空之旅是很重要的。諗下下次去邊度玩好先～

****************

FACEBOOK: 屋邨妹看世界

U Blog: 尤記。猶記

【吉野家 食龍蝦】

今日做一做 food blogger，同奀仔去一嚐吉野家新出的「龍蝦湯」火鍋。

說是新出，其實也不完全正確。吉野家的龍蝦湯底不是新鮮玩意，記憶中去年差不多這個時候就吃過了。要留住一班客仔，定時推出「限時口味」是需要的。要說到新的賣點，大概指這個「10吋長波士頓龍蝦」。

飢餓銷售既要決係 … 你想買？無咁易。

所以今次既策略係，湯底間間有，「10吋長龍蝦」只有20間有，仲要「供應期有限限量發售售完即止」。

於是乎閒人一號小妹我與奀仔早早去到最就近的分店，6時開始發售火鍋，我地5點40分已經坐低左，6點01分落單完畢。

Yeahyeah，食喇喂。我們的例牌：兩烏冬、一牛一雞、一可樂一美連達走冰。

湯滾了，先試喝一口，唔… 味道很淡。

再看看火鍋配料：粟米X 1、蝦仔 X 2、青口仔 X 2、冬菇 X 1、腐皮 X 1、再加一堆蔬菜 （包括金菇和豆腐）以及 … 沒有了。感覺是有點單薄呀下，全盛時期的吉野家火鍋料好像更豐富一點。

不過唔緊要，我地今日既重頭戲係 … 龍蝦哥！

呢隻龍蝦就確係無揸流灘，以普羅大眾一般對吉野家既期望黎講，性價比算係唔錯。食落都小小彈牙，談不上新鮮但都乾淨企理，吃得安心最緊要。而且份量都算多，都有好多啖肉咬下，不錯不錯。

唔知係咪有賣龍蝦呢20間算係比較重點既吉野家，我地今日食呢間就設有自助醬料區。平時食開屋邨內的吉野家，醬料只有麻醬一個選擇，今日呢度除左有埋豉油，仲有供應我最愛既炸蒜，算係好好服務。

總結

龍蝦湯火鍋套餐 $69

買兩份火鍋 (一定要係龍蝦湯呢款) 另加 $68 就可加購兩個半份「10吋長波士頓龍蝦」。

明嗎? 即是預你起碼要兩個人去食，咁就可以一人一鍋 + 一人半隻龍蝦，每人盛惠 $69 + (68/2) = $103。咁如果3個人又或者5個人去食呢？唔知喎 ……

$103 是否好抵，見仁見智。不過奀仔就問我，「er … 食吉野家都食到過百，點解唔加多少少去樓上『牛Ｘ』放題呀？人地係任食仲有哈根達斯雪糕添。」

其實我都唔知點解。如果你問我會唔會再食吉野家火鍋，答案一定係會，不過應該會食返長蟹棒鍋唔食龍蝦湯lu。

講開又講，大家最愛既打邊爐又係邊間呢？

龍蝦湯の鍋 激賞優惠指定分店地址

***********************************

U blog: 尤記。猶記

FACEBOOK: 屋邨妹看世界

IG: yaukeeyk

五一大澳遊

繼兩年前的 五一坪洲遊，今年勞動節繼續親親離島。

不過今次唔係坐船而係坐車，出發地唔係中環而係東涌。

 大澳唔係第一次去，坐車行路都試過，但今次行呢段路就係第一次呢。

路線：羌山道 > 深屈道 > 深屈灣 > 大澳 > 虎山 > 大澳 (Ref: 虎山 – 綠洲)

與友人在東涌鐵路站相會後，便在富東廣場站乘新大嶼山巴士11號線出發 ^^

呢條線在假期班次好密的，我地好好彩，等了不過數分鐘就有車了。

大嶼山巴士是沒有報站兼不是站站停的，所以像我們一樣不太熟路而又不是總站下車的大家，上車時同車長講聲在哪個站落就可以了。到站時車長會停站的，不過就未必會開聲提你，自己留意返。

我們在深屈道下車，資料說車程大概要40分鐘。經過石壁後不久就到了。

如果像我這樣少見世面想睇下監獄是甚麼樣子的朋友可以選擇坐在左邊位置，向下俯瞰整座監獄就在眼底~

當然除了監獄外，水塘的風景也很美。所以到下個行山季就打算行呢段水塘徑 :P

好喇，到左，下車的只有我們沒有別的遊人。

見到個車站真係忍唔住笑出黎，好似被人扔低在荒山野嶺的感覺。留意返旁邊還有半乾不新的牛糞…

正式出發!  路線不用多介紹，因為沒有分岔口的，跟住綠洲簡而精的描述沒有機會走錯。

起點大概是這樣，慶幸當日天氣不錯。

無落雨也不是很猛太陽，雖然最後都係曬紅了 … 紫外線啊不能輕視

行呀行 … 行極都係馬路。頭半小時看不到遊人也見不到車輛。

不過大嶼山的山景比起新界又自不同~ 被群山圍繞的感覺更加濃厚

行行下終於遇上有私家車經過，還示意問我們要不要坐順風車，謝謝喇好心人。

行了約一小時，終於轉入綠洲所說的 林中水泥徑，亦在此後開始陸續遇上其他遊人。

遠眺港珠澳大橋。

　

然後開始轉走山徑，大澳在望了。

好美的花蕊

過埋呢個牌，差唔多到 lu

到喇 !! 水鄉特產 : 咸魚與棚屋 :)

  

到了大澳，行程未完喔。還有兩個重點：虎山觀景台 與 大澳文物酒店

其實呢，我是在網上看到虎山郊遊徑的綠草與紅欄杆相片而被吸引而走這一段的。

而大澳文物酒店，本來沒太大興趣，結果是意外之喜。

要上虎山觀景台，是不用走上文所述那一段路的。直接坐車到大澳市，找到少林武術中心，面向中心在左邊的小徑上走就可以了。

這條路喔。

大澳市中心到處的路牌很清晰，很容易找的。

這就是吸引了我的虎山　 :)

有白海豚像 也有 標高柱
[ 不過起條橋咁鬼大工程，哪還會有白海豚呢 … ]
 

虎山就是很短的一段路，左邊望海，右邊回望大澳。 

這段路暫時是單程路，盡處有涼亭與望遠鏡(免費的喔)，就是所謂的觀景台了。
看夠就要往回走，沿來路下山了。

然後我們向第二個重點進發 — 大澳文物酒店。

讓我有少許去了甚麼甚麼 resort 的感覺。

酒店前身是舊大澳警署，地方不大，翻新改建後變得十分有氣質。

　

這兒讓我想起綠滙學苑，同樣是舊警署，同樣被翻新然後有住宿這 function。

不過當然這裡比大埔美得多了，有無敵海景。但我對大埔的感情卻又是毋庸置疑的。

　

平日一晚的住宿費好像是千多元，老實說也不是負擔不起，以這裡的漂亮景致也是值得的。

不過客房一開門就是公共空間，再往下往前一點就是大海了。早上倒還好，到了晚上估計會靜寂得可怕吧。聞說這兒以前也是海盜橫行的呢。

這是酒店的餐廳，真的好靚好靚，哈哈。不過我地就無喺度食野，到此一遊就好。

因為我們去了吃更地道以及性價比更高的 … !

沙翁 $10

炭燒雞蛋仔 $18　我們吃的是黑超伯伯那檔喔。

　

以及 … 香妃卷 $30。三間店都在吉慶街，就在毗鄰。見到一間就會見到其餘兩間架喇。

睇返都覺得好味 ~ HAHA

行程大概就這樣，謝謝收看。

Btw，有無朋友坐過船由屯門到大澳？感覺如何呢？

*******************************

延伸閱讀：猛料阿Sir講古——大澳警魔故事

U blog: 尤記。猶記

FACEBOOK: 屋邨妹看世界

IG: yaukeeyk