今日去逛一個香港老地方 - 龍華酒店
同埋睇佢入邊嘅展覽 ～ 香港光影
先講個展覽，需要入場費，同埋其實成個地方有啲細。不過我覺得值得睇，本身我就係比較鍾意舊事舊物，加上成個展覽可以任影相、所有嘢都可以摸同拎上手睇。
今日同埋阿女一齊去，本身我以為佢對舊物會冇乜興趣。但係佢表現都好興奮，見到舊式嘅High Chair佢都知道係比小朋友😂 可能根本物件喺小朋友眼中只有用處之分，而冇新舊之分。
阿女指住其中部舊式學行車同我講：媽媽，你細個坐呢部。
講完個展覽，就講吓龍華酒店，佢嘅歷史大家都可以上維基睇（我最感興趣係金庸其中幾本小說都係居於此處嘅時候寫嘅）。我最估唔到係原來而家仲有養緊孔雀，然後食嘢嗰層又有隻鸚鵡，會講Hello又會講你好嗎
阿女第一次見孔雀同鸚鵡表示驚驚
有啲欣喜係以為呢度而家已經冇乜人去，但我哋下午時分去都有人食緊嘢，同埋keep住都有遊人，可能呢度都真係唔少人嘅回憶。
龍華酒店入面而家竟然有瀡滑梯 😂 意想不到，玩咗一陣感覺都唔錯。雖然走嘅時候發現阿女對手污槽晒應該係啲膠滑梯耐無人玩已經鋪晒塵。
假日可以一家人周圍行吓咁都覺得幾寫意。又計劃吓下次去邊度玩先。
