點解要揀註冊處？ - 登記註冊及流程分享 (2)

好吧，真係入正題。

上回 (點解要揀註冊處？ - 登記註冊及婚禮流程分享 (1)) 略略提過註冊處的地點及收費，今次講得再詳細啲。

五個地點：

新界東之選 - 沙田 

新界西之選 - 屯門

全港最方便之選 - 尖沙咀

氣派之選 - 大會堂

浪漫之選 - 紅棉路

收費 ：

喺註冊處登記既賣點係同所有公共服務一樣，不需要搵律師，自己上網就搞掂。

不過就點都要親身去兩次註冊處，第一次係交form及交登記費 （$305），第二次就係行禮同交場租（$715 平日辦公時間/ $1,935 非辦公時間）了。

登記流程

1. 先上呢度 (預約遞交擬結婚通知書)，check 下你心儀日子最早可以邊年邊月邊日登記。

2. 到左上述 （1）既日子，朝早8點就可以上網入資料了。要準備 新人姓名+出生日期+身份證號碼 。

3. 入好資料登記後，系統會俾個日子時間你，到時親身去交錢。留意返通常會係一個平日黎，可能要請假去。

4. 去交form當日，職員會同你對資料。要填雙方住址、職業同父母親姓名 （就算不幸父母或其中一方已不在，都係照填佢地個名落去既，因為會 show 喺結婚證書 ）。之後再要去主任度簡單問幾句，confirm返你係咪未結過婚之類，程序都好簡單順利。之後交錢 & 俾張通知你就 ok 走得。

婚禮當天

- 婚禮當日，早 15 分鐘去到。記得一定要帶新人 + 兩名見証人既身份證正本。

- 職員會再叫名，同你再對一對資料，真係要啱架因為會印落結婚証書。

到你登記果個時段，職員會叫新人名，就可以入禮堂喇 （禮堂係隨機 assign，無得揀）。

我地既攝影師好熟手，幫我地簡單 brief 左親友同安排流程。

先請親友入去就座，見證人並排坐枱既一邊，新人喺禮堂外稍等，兄弟姊妹勁快速簡單幫忙佈置下張枱，戒指（連盒）放定喺枱面。註冊處本身有枱花，我就放埋我一對結婚公仔~

之後佈置好就請兩位兄弟開門，新人進場，親友拍手歡呼。（我發現唔拉起婚紗個裙身係好難行，如果要行得好靚好優雅可能真係要先練一練。）

入到去坐枱既另一邊（見證人既對面），見到枱面有宣誓卡 （紅色既，都好喜慶。攝影師提我地一定要拎起讀，咁樣影相先靚），同埋已經放好左預備要簽既文件（有個紅色膠套套住，雖然個套唔係俾你帶走，但影相都靚）。

枱既短邊有位木無表情既職員，本來以為佢就係登記官，當時心諗「噢，政府野果然係咁。」 

我地坐低之後，無表情職員話要去通知登記官。入黎既男職員雖然唔係笑容燦爛（佢入黎時新人要起立），但感覺都幾莊嚴，有恰到好處既表情。

註冊過程好簡單，登記官宣讀細節，新人宣誓，交換戒指，揭頭紗，簽名。

特別想讚既係我地遇到既登記官表現好好，語速不徐不疾，語氣穩重，但又無做得太耐滑晒牙既感覺。呢種嚴肅認真就係我想搵既野。

最後簽好名，佢先同我老公講「恭喜x生」，我個腦仲 load 緊佢跟住會同我講 「恭喜 x 小姐」。但佢下一句就係「恭喜x太」。感覺好好。正正式式成為X太。

X生，請繼續多多指教～

最後，入境處會有個紙file送俾你~ 記得叫兄弟姊妹幫你袋返好張結婚證書啊。得一張架咋，唔係一人一張。

**********

小小感想：

- 每對新人使用禮堂係得15分鐘，對我黎講係好既，繁文褥節真的不需要太多。不過就無得播音樂無得慢慢march in，未必個個鍾意。

- 註冊處係有新娘房，不過結果我都係無入過去，建議新人在註冊處以外諗好地方換好衫同妝先去，因為到時又多新人又多親友，其實地方都淺窄。

- 有個迷思係，仲以為新人資料刊登15日係好似細個時候咁有個board貼張紙出黎。原來宜家係轉左電子顯示，註冊處內有兩個電腦screen，click入去就睇到資料。

- 無rehearsal 無綵排無briefing，事前亦唔會知你既註冊官係邊位。不過對我黎講又係煩少樣，唔洗擔心個律師會唔會遲到之類。

- 結婚果日基本上咩vendor咩職員都會派利是俾佢地，註冊處職員唔洗。

- 結論，確實幾滿意。

**********

有興趣看小妹分享的也請支持一下我的   ig account : yaukeeyk 莎莉看世界～有Sally同Brown既日常點滴。

多謝收看~